Një libër disi i veçantë për krijimtarinë e Miho Gjinit, të cilin deri tani lexuesi e ka njohur në “kostumin” e kritikut dhe studiuesit të teatrit, por edhe të prozatorit cilësor, që di të gjejë e të përshkruajë bukur situata e personazhe të goditura. Pra, në këtë libër, autori na paraqitet në zhanrin e memorialistikës, për fat të keq, në një pjesë të jetës së tij mbushur me tone të errëta e gri. Miho Gjini i jep lexuesit nëpërmjet një ditari të përditësuar, kujtimet e mbresat e tij të punës e të jetës në Memaliaj, të ngërthyera fort edhe me copëza jete e personazhe të shumta në Tiranë, Piqeras e vise të tjera të vendit.