Në vitin 1919, pas vizitës së parë në Tahiti dhe Samoa, Momi shkruajti romanin “Hëna dhe gjashtë pensët”. Subjekti i jashtëzakonshëm artistik, motivet origjinale dhe psikologjia e personazheve i garantuan sukses absolut. Libri është shkruar me nerv të përkryer letrar dhe gjallëri, duke e bërë për lexuesin mjaft tërheqës. Si subjekt romanit i ka shërbyer jeta e piktorit të njohur francez, Pol Gogen (1848-1903). Momi shfrytëzoi momentet më të rëndësishme por edhe kritike të biografisë së artistit, angazhimin e tij të vonuar me pikturën, ndarjen nga familja, mospranimin e rregullave të artit akademik deri tek rrugët dhe format e reja të shprehjes artistike.