Althusser rreket të hedhë poshtë mitin e "filozofëve", veçanërisht sipas konceptimit idealist, sipas të cilit filozofi e ushtron veprimtarinë e tij në suaza teorike, në një mjedis të mbyllur, madje shpesh të brendshëm, shpirtëror. Althusser i qaset filozofisë në terma materialiste, si një dije e gjallë dhe e lidhur ngushtë me jetën e përditshme. Në këtë kuptim, "jofilozofët" e titullit nuk duhen kuptuar si njerëz të pamësuar me "filozofinë" -- ndonëse mund të jenë të tillë--, por si subjekte pjesëmarrëse me të drejta të plota në fushën e dijeve njerëzore dhe në jetën shoqërore.