Me gjasë, fjalia e mësipërme ju ka trazuar apo ju ka nxitur të arsyetoni për porosinë e saj. Kjo fjali është shkëputur nga libri i radhës i Logos-A, të cilin e keni në duar, e që është produkt i një mendjeje të thellë, që është e para që e ka përdorur shprehjen "kuptim i jetës" (meaning of life), e cila frymëzon filozofë, teologë, madje edhe njerëz të thjeshtë, dhe shpesh del edhe si temë debati dhe kontemplimi, madje edhe në mijëvjeçarin e tretë.Qëmoti është thënë se "klasikja nuk vdes kurrë". E tillë duhet të jetë vepra e Thomas Carlyle (1795-1881), Mbi heronjtë, që më në fund po vjen edhe në gjuhën shqipe, si një tekst i arrirë i një historiani, eseisti, kritiku, sociologu e filozofi të mirënjohur britanik nga epoka viktoriane.I cilësuar si profet shekullar dhe "koka e padiskutueshme e letrave në gjuhën angleze" (Emerson), Carlyle në këtë libër i madhëron njerëzit e mëdhenj dhe të popullarizuar përgjatë historisë, i shqyrton llojet e ndryshme të heronjve përmes arketipave që përfshijnë heroin-hyjni (mitet pagane, Odinin), heroin profet (Muhamedin), atë poet (Danten dhe Shekspirin), klerikun (Martin Luterin dhe John Knox-in), letrarin (Samuel Jackson dhe Jean-Jacques Rousseau) dhe pushtetarin (Oliver Cromwellin dhe Napoleonin).Sidoqoftë, Mbi heronjtë ka hyrë në analet e monumenteve, e që e përjetëson autorin me mesazhin e dhënë për njerëzit e mëdhenj, të cilët motivohen nga idealet që i bëjnë ambiciozë, dhe që nuk çajnë shumë kokën për opinionet dhe atë që thonë njerëzit. S'është e rastësishme që prej tij janë ndikuar figura si Marks, Gandi, R. Wagner, Emerson, Ruskin, DuBois, M.L. King Jr. etj. Kjo vepër e përkthyer në dhjetëra gjuhë botërore është e rëndësishme në veçanti për historianët, për ata që merren me filozofi, sociologji e disiplina të ngjashme.