Historia është e mbushur me jetëpërshkrime personalitetesh të shquara që i përkasin qytetërimeve dhe etnive të ndryshme, të cilët ravijëzuan hartat e botës dhe ndryshuan ekuilibrat strategjikë të forcave. Në dimensionin strategjik, Pejgamberi Muhammed a.s. arriti të kryejë një përmbysje strategjike botërore, të shpejtë dhe rrënjësore, e cila ndryshon kryekëput nga ajo e personaliteteve të tjerë, sepse qasja e tij strategjike nuk buron nga centralizimi i pushtetit dhe monopolizimi i pasurisë, ashtu siç nuk burojnë veprimet e tij nga një pikënisje kombëtare apo ambicje perandorake. Nga ky dimension kuptohet veçanësia e veprimeve pejgamberike, për sa i përket anës strategjike.Në këtë libër, do të mundohemi që të studiojmë metodologjinë strategjike të Pejgamberit a.s., duke hedhur shikimin mbi veprimet e tij strategjike deri në çlirimin e Mekës. Me këtë gjë, kemi ndërmend çdo veprim apo fjalë të tij në kuadrin e marrëdhënieve me forcat, fiset dhe personat e ndryshëm. Më pas do të vijëzojmë hartën strategjike dhe ekonomike të botës përreth Mekës, duke paraqitur ekuilibrat e forcave botërore dhe rajonale përpara dërgatës pejgamberike. Pas kësaj, do të gjurmojmë se si Jethribi u shndërrua nga një fshat i copëtuar nga konflikti në një qytet të mbushur me rend dhe nisma, me një vizion strategjik të guximshëm, që brenda pak vitesh, hodhi themelet e një pakti të ri që rivalizonte me paktin e kalbur të Mekës.Do të shqyrtojmë, fillimisht teorikisht dhe më pas praktikisht, se sa e shkëlqyer ishte metoda strategjike e Pejgamberit a.s. në përballjet e tij ushtarake, në aleancat e tij politike si dhe në strukturën shpirtërore që shoqëronte marshimin përpara. Do të shohim se si mesazhi që ai barti ishte qendra e vërtetë e të gjitha lëvizjeve të tij, se ishte pikërisht ky mesazh, që me ndërveprimin e tij me realitetin strategjik dhe politik, gjeneroi një metodë të ndryshme nga metodat e tjera që bota kishte njohur më parë dhe se si kjo metodë unike arriti me të vërtetë suksese të mëdha në një botë plot me konflikte, shpërbërje dhe mungesë vizioni.