Interesi im lidhur me "Shkupin 2014" që përbën subjektin e këtij libri lindi nga polemikat dhe diskutimet e nxehta të nxitura nga ky projekt urban dhe hapësinor "madhështor" dhe i shtrenjtë financiarisht, në një shtet si Republika e Maqedonisë që përbën një nga vendet më të varfra dhe më të vogla të Europës dhe Ballkanit. Në fakt, në vitin 2010 kur për herë të parë zyrtarisht u promovua ky projekt s'e kisha idenë se çfarë përbën ai. Pra shkaku dhe motivet në prapaskenë të këtij projekti për mua ishin të panjohura. Me kalimin e kohës fillova të kuptoj se kjo ndërmarrje nuk duhet të kufizohet vetëm me përmasën hapësinore dhe urbane."Shkupi 2014" ishte diçka që simbolizonte diçka përtej fizikes ose urbanes. Mësova se nëpërmjet strategjive hapësinore, përmes simboleve në forma të ndryshme dhe stileve arkitektonike synohej të ndërtohej një narrativë dhe identitet të "ri" kombëtar. Pas bërjes së leximeve bazike rreth historisë kombëtare dhe asaj që quhet "Çështja e Maqedonisë" dalëngadalë po më qartësohej se pse ishte iniciuar ky projekt që është pasqyrim i një nacionalizmi romantik në Europën dhe Ballkanin e shekullit XXI.Ky libër është version i përpunuar i tezës time të doktoratës me titull Ndërtimi i identitetit të ri maqedonas: Projekti "Shkupi 2014 të mbrojtur në tetor të vitit 2020 në departamentin e Shkencave Politike dhe Marrëdhënieve Ndërkombëtare të Universitetit të Stambollit. Procesi i përpilimi të këtij teksti sigurisht nuk përfundoi me aktin ceremonial të mbrojtjes, ndërkohë vazhduam me plotësimin e boshllëqeve, begatimin dhe përmirësimin e materialit shkencor të mbrojtur publikisht. Sidoqoftë, hipotezat dhe metodologjia e disertacionit kanë mbetur të njëjta ose thënë ndryshe nuk kanë pësuar ndonjë ndryshim substancial.