Lavdrim Lita e ndriçon me kujdes në këtë libër kompleksitetin e veprimtarisë së shumëfishtë të Jean Monnet, figurë e shquar politike europiane, i cili realizoi një gërshetim të ngushtë midis të menduarit politik dhe aksioneve politike në rrugëtimin e tij nëpër sfidat e rindërtimit të Europës. Bien në sy, në veçanti, koherenca e zhvillimit gradual të aspekteve të ndryshme, që kanë të bëjnë me historinë ekonomike e politike të vendeve europiane: në veçanti rolin e Luftës së Dytë Botërore, me përmasat e saj shkatërrimtare, në zgjimin e ideve për të kërkuar një rrugëdalje nga spiralja e luftërave, të cilat shikoheshin si "domosdoshmëri e paevitueshme" në histori. Këto analiza zhvillohen brenda katër kapitujve: Njeriu, Ideja, Metoda dhe Instrumenti.Autori e ka vijëzuar fort mirë rolin luçid të Monnet, prej planeve për rindërtimin e Europës e deri te ideja e Europës së Bashkuar, duke vënë në pah edhe rëndësinë e koncepsioneve të mendimtarëve të shquar europianë për këtë ide, prej Montesquieu e deri te autorët bashkëkohorë. Analizat e Litës kanë gjetur mbështetje mbi një literaturë të begatshme ndërkombëtare kushtuar kësaj teme. Titujt e kapitujve sqarojnë etapat e krijimit të Bashkimit Europian dhe sfidave, me të cilat ai u ballafaqua në formësimin e tij. Lita në veçanti ka marrë në shqyrtim edhe përkushtimin e Monet që të ndërhynte me një propozim në momentin kur situata e krizës, e ardhur nga faktorë të jashtëm, kërkonte që një "lider i ndriçuar të jepte një zgjidhje të re" si dhe "konceptin e metodës si çelës i leximit të stilit të punës së Monet", të kërkimeve të tij teoriko- praktike mbi projektin e Shteteve të Bashkuara të Europës.