Kur mbaron së lexuari librin e tretë të autorit Mustafa Haxhi, në të cilin paraqiten në mënyrë të thjeshtë e të bukur gjëegjëza të stolisura me merak, ndien kënaqësi. Vlerat e këtyre krijimeve origjinale, të vogla e të thjeshta, na nxjerrin në pah me një qartësi e vërtetësi të admirueshme. Çdo gjëegjëzë është krijuar e sistemuar në formën e një poezie të shkurtër e kuptimplote, gjë që të ngjall detyrimisht një kënaqësi të veçantë. Gjëegjëzat e këtij vëllimi të vënë në punë mendjen për ta gjetur zgjidhjen, prandaj kanë dhe një vlerë të shtuar edukative e mësimore, sidomos për brezin e ri. Ato janë një pasuri në kulturën e çdo njeriu.