“Prendimi i andrrimeve”, përgatitur nga Lisandri Kola, është ribotim i përmbledhjes poetike të poetit Gasper Pali, pajisur me shënime të hollësishme nga Lisandri Kola, me fotografi, materiale faksimile dhe një intervistë. Pali  i  takon  atij  grupi  autorësh  të viteve ‘30- ‘40 që  patën  fatin  e  keq të  kenë  një  jetë  të shkurtër, një poezi të pakët në vëllim, të botuar kryesisht në organet e shtypit, por me  vlera  të  vëna në  dukje që  në  botimin e parë. Ai shuhet nga tuberkulozi në moshën 27-vjeçare. Gasper Pali është  ndër ata autorë  që  gjatë  gjysmës së dytë  të  shekullit të shkuar nuk u mohuan, por  që  si  pasojë  e  mungesës  së botimeve  dhe  pëfshirjes  në  antologjitë  shkollore,  mbetën  pak  të  njohur  nga lexuesi i gjerë. Poezia e Palit përqendrohet te dialogu  me  vetveten,  dhe ndjeshmëritë e tij të larta, bashkë me elementet  më personale dhe intime. Vlerën e poezisë së Palit e shënjoi edhe periudha në të cilin ai shkroi, periudhë mjaft e rëndësishme në dialogun e letërsisë shqipe me poetikat bashkëkohore perëndimore.