Qysh nga muaji tetor 1996, Sali Berisha na ka akuzuar pareshtur se kemi krijuar një organizatë kriminale me emrin "Hakmarrja Shqiptare e Drejtësisë". Sipas deklaratave zyrtare të fillimit, qellimi i krijimit të organizatës, mënyra si kishte funksionuar ajo, krimet që kishte kryer, krimet që kishte përgatitur të kryente dhe lidhjet me opozitën (Partinë Socialiste), përveç që ishin vërtetuar shkencërisht me provat që ishin kapur, ne ua kishim pohuar edhe hetuesve, duke u shprehur para tyre se: ideali ynë ishte "t'u mbush mendjen shqiptarëve se demokracia është krim", se "Ashtu siç kishit ju ideal përmbysjen e Enver Hoxhës, unë kam përmbysjen e Sali Berishës". (Burimi i citimeve saktësohet në përmbajtjen e librit). Sipas akuzave, qëllimi ynë kishte qenë destabilizimi i rendit nëpërmjet krijimit të pasigurisë që do ta arrinim me krimet që kishim kryer dhe do të kryenim, si: vrasja e presidentit të vendit, Sali Berisha dhe e funksionarëve të tjerë të shtetit, vjedhje bankash, shkatërrime me lëndë plasëse të pasurisë së kapitalistëve të rinj etj. dhe, objektivi final, përmbysja e regjimit demokratik. Dita kur u deklaruan akuzat ishte datëlindja e Enver Hoxhës dhe prag i zgjedhjeve për pushtetin vendor.