Një roman për familjet Melori dhe Anderson. Një dëshirë e ethshme për hakmarrje shndërrohet në një pasion të papritur. Për herë të parë Xhejms Melori dhe krushqit e tij Andersonët bien dakord në diçka: ka ardhur koha të marrin shpagim ndaj rrëmbyesit, i cili kishte guxuar të rrëmbente vajzën e dashur të Xhejms dhe Xhorxhina Melorit, Xhekin, edhe pse ajo kishte mundur t’i ikte pa u dëmtuar. Xhekin e kishte pushtuar zemërimi, sepse i ati nuk pranoi ta merrte me vete, kur ndërmori udhëtimin për në Karaibe për të ndjekur keqbërësin. Kështu, kur një i panjohur misterioz i ofron ndihmën e tij për ta çuar te rrëmbyesi, Xheki sheh një mundësi për ta ndëshkuar vetë në stilin e Melorive. Gjërat nuk shkojnë krejt sipas planit dhe Xheki përfundon sërish e zënë në kurth dhe e ngujuar në një anije që po largohet nga brigjet e Anglisë. Ajo e kupton shpejt se ai që e ka kapur nuk është një pirat, por një fisnik i vendosur për të zgjidhur një çështje të vjetër me babanë e saj dhe ajo që e rrezikon më shumë është rritja e flakës së pasionit midis tyre. Ta lemë, pra, legjendaren Johanna Lindsey t’ju pushtojë zemrën me romancën e saj të paharrueshme. “Ajo nuk të zhgënjen kurrë, duke shkruar histori dashurie që të çojnë në thelbin e asaj ç’mund të jetë dhe ç’duhet të jetë dashuria… pasionante, e fuqishme dhe e mbushur me surpriza”.