Kristos Armando Gezos lindi më 1988 në Himarë dhe në moshë të vogël emigroi, bashkë me familjen, në Greqi. Këtu kreu studimet për gjeodezi, në Universitetin e Athinës. Është autor i romaneve 'Balta' (2014), 'Gjilpëra humbi' (2021), i librit me tregime 'Shilarësi' (2016), dhe i librit për fëmijë 'Pema që kishte si kokë një top' (2019). Më 2013 është shpërblyer me "Çmimin Kombëtar të Autorit të Ri" për vëllimin me poezi 'Frikëra të papërmbushura'. 'Balta' është vepra e parë e tij që botohet në shqip. 28 vjeçari Aleksandër kthehet në Athinë pas një viti, me qëllim vetëvrasjen. Teksa rreket që të realizojë detajet e fundit të planit të tij, endet rrugëve të Athinës, duke u kalamendur mes së shkuarës dhe të tashmes asfiksuese, përballet me dobësitë vetjake dhe mjedisin e ashpër njerëzor përmes monologëve dëshpërues rreth vendit të tij në botën njerëzore.